Jæja þá á ég bara eina nótt eftir í Noregi og svo fer ég aftur til London á morgun og lendi síðan loksins í Hong Kong á þriðjudagskvöld. Þaðan tek ég síðan rútu til GuangZhou í Kína þar sem ég ætla að vera hjá honum Einsa mínum í eina viku.

Dvölin í Noregi er búin að vera voðalega notarleg. Í gær fórum við í göngutúr um miðbæ Sandnes og Stavanger og elduðum síðan góðan mat um kvöldið. Ég er orðin meistari í að byggja Lego kastala og er farin að þekkja söguþráðinn í Emil í Kattholti ansi vel. Íris Adda er búin að vera mín einka vekjaraklukka á morgnanna sem er fínt því ekki veitir af að byrja að snúa sólarhringnum við.

Í dag ( sunnudag ) er bolludagur í Noregi, Bella skellti því bollum í ofninn og Amma kom í kaffi. Ég get ekki sagt að ég fari vannærð frá Noregi því ég er varla búin að gera neitt annað en að borða síðan að ég kom.
Sótarinn kemur á morgun að hreinsa strompinn...ég vona að ég sjái hann áður en ég fer. Bella sagði að hann væri svartur í framan með ljóst hár og blá augu...alveg eins og í ævintýrunum ! Ég hef allavegana aldrei séð alvöru sótara á ævinni.

Áður en ég lagði af stað frá Íslandi bilaði tölvan mín...inni á henni var meðal annars öll tónlistin mín rúm 10GB. Ég var nú ekkert að stressa mig sérstaklega yfir því fyrst að ég á þennan fína i-pot sem hélt líka utan um öll lögin mín. En svo í gær fórum við Sveinn eitthvað að fikta með i-pottinn sem endaði líka bara með því að öll lögin þurrkuðust út af honum !!! AAArrrrrrrrg...þannig að ég fæ ekki tónlistina mína aftur fyrr en að tölvan er komin í lag sem verður í fyrstalagi eftir 2 vikur. Sem betur fer tók ég með mér Mugison diskinn og svo keypti ég mér Elliott Smith disk í gær

Þar sem að ekki er vinsælt að fólk sé að blogga í Kína þá á ég líklegast ekki eftir að blogga neitt fyrr en að ég kem aftur til Taiwan.